Америка шетелдік қылмыстық ұйымдарды қудалауды бастады

АҚШ-тың Мемлекет хатшысы Рубио өз елінің ұлттық қауіпсіздігіне және экономикалық мүдделеріне қауіп төндіретін ұйымдарды атады. Бұл туралы «Америка дауысы» жазды.

АҚШ бірнеше қылмыстық топтар мен картельдерді шетелдік террористік ұйымдар деп жариялады. Тиісті хабарлама бейсенбіде ресми Federal Register басылымында жарияланды.

Бұл Дональд Трамптың көші-қон бақылауын қатайту және АҚШ-тағы қылмыстық топтарға қарсы күрес жүргізу саясаты аясындағы келесі қадамы.

Атап айтқанда, тізімге сегіз шетелдік қылмыстық ұйым қосылды. Олардың ішінде:

- Венесуэладағы қылмыстық ұйым «Трен де Арагуа» (Tren de Aragua);

- Мексикалық наркокартель «Синалоа» (Sinaloa);

- «Мара Сальватруча» (Mara Salvatrucha, немесе MS-13);

- Мексикада орналасқан «Картель Нового поколения Халиско» (Cartel de Jalisco Nueva Generacion, CJNG);

- Мексикалық қылмыстық одақ «Картелес Унидос» (Carteles Unidos);

- «Картель дель Норесте» Қылмыстық ұйымы (Cartel del Noreste, CDN);

- Қылмыстық синдикат «Картель Гольфо» (Cartel del Golfo, немесе «Картель залива»);

- Мексикалық картель «Ла Нуева Фамилия Мичоакана» (La Nueva Familia Michoacana, LNFM).

Мемлекет хатшысы Марко Рубионың мәлімдемесіне сәйкес, бұл ұйымдар АҚШ-тың ұлттық қауіпсіздігіне, сыртқы саясатына және экономикалық мүдделеріне қауіп төндіреді.

20 қаңтарда президенттік қызметіне кіріскеннен кейін, Трамп трансұлттық қылмыстық топтар мен картельдерді террористік ұйымдар деп танып, олардың мүмкіндіктерін зерттеу туралы жарлыққа қол қойды.

Трамп осы айдың басында Мексика мен Канададан келетін тауарларға жоғары баж салығын енгізуді кейінге қалдырды. Президент бұл елдер заңсыз миграция және фентанил контрабандасымен күресуге жеткілікті күш салмайтынын мәлімдеді.

Трамптың алғашқы президенттік мерзімінде ол картельдерді террористік ұйымдар тізіміне қосу мүмкіндігін қарастырған еді, бірақ бұл шарадан бас тартты. Сол кезде бірқатар жоғары лауазымды шенеуніктер Мексикамен қатынастың нашарлауы мен есірткі саудасымен күрестің күрделенуіне қатысты алаңдаушылық білдірген. Сондай-ақ, бұл қадам мигранттардың АҚШ-тан баспана алу мүмкіндігі артады деген қауіп туындаған, өйткені олар террористерден жасырынуға негіз ретінде дәлел келтіруі мүмкін еді.

Сарапшылар бұл жаңа шешімнің картельдерге ақша төлейтін мигранттарды қылмыстық қудалау немесе АҚШ-қа кіруге тыйым салуға әкелуі мүмкін екенін болжайды.

Ұйымды террористік деп тану оның қатысушыларына қарсы санкциялар енгізуге, соның ішінде активтерді бұғаттау және АҚШ-қа кіруге тыйым салуды қамтиды. Алайда жаңа шектеулердің ауқымы әзірге белгісіз.

Фото: halyqline.kz