Мопедші жүк көлігіне соғылып қаза тапты

Елорда тұрғыны мопед рулін басқара алмай КамАз-ға соғылған. Бұл туралы Астана қалалық Полиция департаменті хабарлады.

«25 тамызда сағат 21:14 шамасында мопед жүргізушісі Қабанбай батыр даңғылынан Ақмешіт көшесіне қарай Сарайшық көшесімен келе жатып, рульді басқара алмай, тұрған «КамАЗ» автокөлігіне соқты. Апат салдарынан мопед жүргізушісі оқиға орнында қайтыс болды», - делінген елорда полициясының баспасөз қызметі таратқан ақпаратта.

Аталған дерек бойынша қылмыстық іс қозғалып, тергеу жүріп жатыр.

Айта кетейік, Ішкі істер министрлігінің мәліметінше, биыл мопедтерге қатысты жол-көлік оқиғасында 40-тан астам адам мерт болған.

Фото: Baq.kz